मसंग बसिकन तिमीले के के लियौ कुन्नी
उत्ताउलो बन्दै गाछौ झोंकमा के के पियौ कुन्नी ।

हिजोसम्म सभ्यशील लजाउँथ्यौ जहिले पनि
आज हेर्दा कुरै बेग्लै तिमीले के के दियौ कुन्नी ।

मन खोली खेल्न तिमी पहिल्यैदेखि नमान्ने थियौ
अचानक मन फेरेर तिमीले के के सियौ कुन्नी ।

बार्दलीलाई बार हालेर भित्रभित्र केही त भयो
हिजोसम्म सभ्य तिमी आज कसरी जियौ कुन्नी ।

सोमराज पोखरेल ‘लुनाटिक’
असार २,  २०६९,  काठमाडौं ।